Në ambientet e Fakultetit të Mjekësisë Dentare u zhvillua një takim informues në kuadër të proceseve të sigurimit të cilësisë dhe akreditimit të programeve të studimit. Në këtë takim ishin të pranishëm Dekania e Fakultetit, Prof. Asc. Silvana Bara, Drejtoresha e ASCAL, znj. Anisa Subashi, përfaqësuesi i Rektoratit të Universiteti i Mjekësisë, Tiranë, si dhe anëtarët e dy grupeve të vlerësimit të brendshëm të Fakultetit të Mjekësisë Dentare.
Takimi u fokusua në orientimin dhe këshillimin metodologjik të grupeve të punës në funksion të riakreditimit të Programit të Integruar të Ciklit të Dytë “Master i Shkencave” në Stomatologji, si dhe të akreditimit për herë të parë të dy programeve të ciklit të parë “Bachelor” në “Higjienë Dentare” dhe në “Teknikë Dentare”.
Gjatë diskutimeve u theksua rëndësia e procesit të vetëvlerësimit si një instrument thelbësor për garantimin dhe rritjen e cilësisë akademike, përputhshmërinë me standardet kombëtare të sigurimit të cilësisë dhe forcimin e kulturës institucionale të përmirësimit të vazhdueshëm.
Drejtoresha e ASCAL-it ndau me të pranishmit udhëzime konkrete mbi përgatitjen e dokumentacionit, standardet dhe kriteret e vlerësimit, si dhe mbi rëndësinë e përfshirjes aktive të të gjitha strukturave akademike dhe administrative në këtë proces.
Fakulteti i Mjekësisë Dentare mbetet i angazhuar për përmbushjen me rigorozitet të të gjitha standardeve të cilësisë, me synim ofrimin e programeve bashkëkohore, të qëndrueshme dhe në përputhje me kërkesat e tregut të punës dhe zhvillimeve më të fundit në fushën e mjekësisë dentare.
